Myths Buster - Dr. Ahmed Noweir (Healthy Life Clinics)

•

Myths Buster Campaign
Client: Dr. Ahmed Noweir (Healthy Life Clinics)

Senior Content Creator & Ideas: Saja Dahab

Graphic Designer: Mohamed Khaled
Illustrations: Sara Ali Taha
Animation & Composting: Abd El-Rahman Magdi
Art Director: Mohamed Ismail
Agency: AdMedica

بتصحى من النوم، تبقى مجهز كوباية مياة دافية بالعسل والليمون ولا كوباية مياة سخنة وتروح هوووب ضاربها أول حاجة على الريق، ويا سلام ده كده بقى فطاري وفي نفس الوقت وزني هينزل، دي وصفة هايلة!!
طبعاً الكلام ده كله غلط، المياة اللي بتاخدها على الريق سواء سخنة أو دافية لا بتخسس ولا بتخن ومش هتعمل حاجة خالص، ده الـmechanism بتاع جسمك، إنه ياخد درجة الحرارة اللي يوصلها لدرجة حرارة جسمك.. فبكده نوصل إن العكس هو اللي صحيح، لو اخدت مياة ساقعة جسمك هيشتغل ويحرق سعرات علشان يحولها لنفس حرارة جسمك.
برضو المياة الدافية بالليمون والعسل أو بزيت الزيتون مالهاش أي فايدة، أولاً الليمون على الصبح ده غلط وهيشيل طبقة المينا اللي في أسنانك ويزود التسوس!
تاني حاجة أنت كده خدت 140 كالوري على الصبح من الهوا؛ لأن العسل ده جسمك بيتعامل معاه على إنه (سكر)، بل بالعكس معلقة العسل فيها 5 كالوري اكتر من معلقة السكر، يعني هترفع من الأنسولين الصبح وتخليك طول اليوم جعان وعايز تاكل حاجة حلوة.
أما بقى معلقة زيت الزيتون دي فيها 120 كالوري، بس زيت الزيتون ده ليه حدوتة تانية هنتكلم عنها بعدين..
وعلشان تعرفوا أكتر عن السعرات الحرارية لزيت الزيتون وغيره هتلاقوه لينك في أول كومنت لويبسايت بيوضح السعرات الحرارية لكل حاجة بناكلها
فماتحرمش نفسك من الفطار في سبيل حاجات مالهاش أي لازمة، كل الكلام ده خرافات، خد فطارك الصحي؛ لأن إحنا مش بنعتمد على وقت للأكل ناكل فيه ووقت تاني لأ، إحنا بنعتمد على الكمية اللي الجسم محتاجها.
إنسى الخرافات اللي كنت بتسمعها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

"يا دكتور أنا غدايا دلوقتي لا يخلو من طبق الشوربة، كل يوم لازم يكون قدامي شوربة كرنب ولا شوربة خضار على الغدا"
طبعاً فيه ناس كتير زيه وفاكرين إن الشوربة الحارقة دي معجزة هتساعدهم ينزلوا في الوزن، وفاكرين إني هقوله برافو إنه بيعمل كده
لا خالص بقى مش برافو، أولاً شوربة الكرنب دي طعمها وحش جداً ومش عارف بتاكلوها إزاي، وثانياً الشوربة دي مجرد filler، حاجة كده سعراتها الحرارية قليلة وبتملا المعدة لا بتزود الحرق ولا حاجة!
ولا شوربة كرنب ولا شوربة خضار، ولا فيه أي أكلة أو حاجة بتزود الحرق، العملية كلها بتعتمد على أنا باكل قد إيه وبحرق قد إيه..
ودي بقى كانت المعلومة الغلط اللي محتاجين نصطادها كده من مخكم النهاردة ونعرفها كويس وهي "مفيش أكل بيزود الحرق"، مينفعش تحدد لنفسك كل يوم شوية أكلات معينة في غداك أنت مختارها على أساس إنها هتزودلك الحرق؛ لأن الكلام ده خرااافة.
هقولك زي إيه تاني مثلاً؟ عندك "العيش السن"، ماينفعش ناكله بكميات كبيرة لإنه بيزود الحرق! العيش السن healthy جداً علشان فيه ألياف وبيفضل في المعدة فترة طويلة وده بيحسسك بالشبع، وكمان بيخلي السكر يطلع من الجسم واحدة واحدة..
بس مشكلته إنه الـcalories بتاعته إنها زي ويمكن كمان أكتر من العيش الأبيض، وعلشان كده ماينفعش نحطه مع الأكل عمال على بطال وناكل منه كميات كبيرة وإلا هتزود نسبة الدهون في الجسم وتلاقي نفسك بتتخن.
ولو عاوزين تعرفوا أكتر عن السعرات الحرارية الموجودة في العيش السن، هتلاقوا في أول كومنت تحت لينك لويبسايت بيوضح ده وهيساعدكم كتير..
إنسى الخرافات اللي كنت بتسمعها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

"هو يا دكتور المفروض أبطل أكل الساعة كام؟ علشان المفروض العشاء بيتخن صح؟"
ده سؤال بتسأله كتير، بحجة إن ناس كتيرة شايفة إن وجبة العشا بتتخن ولازم نبطل أكل في وقت معين.

خلوني أصطاد الخرافة دي من تفكيركم وأقولكم إن مفيش حاجة إسمها إن وجبة العشا بتخن ولا حاجة إسمها نبطل أكل الساعة كام، العشا ده أوقات كتير بيكون أساسيات النزول في الوزن معانا وإحنا ماشيين على نظام غذائي كوجبة من الوجبات الأساسية..

يعني انت مثلاً لو شخص بتتأخر في شغلك وبترجع تاخد وجبتك الرئيسية اخر اليوم لما بترجع البيت ده مفيهوش مشكلة حتى لو هتاكل وتنام على طول..

طب إمتى دي تكون مشكلة؟
هقولك لو انت شخص عنده ارتجاع في المرئ، وقتها هتحتاج تكون اخر وجبة ليك قبل النوم بساعتين.

يعني أي شخص إلا اللي بيعانوا من ارتجاع المرئ يقدروا ياكلوا في أي وقت، بس ده بقى بيعتمد على الـcalories اللي داخلة جسمنا تبقى داخلة قد إيه مش داخلة الساعة كام.
نفس الكلام ده كله يا جماعة بينطبق على الناس اللي بتقول "لو مافطرتش مش هتخس" مفيش حاجة إسمها كده، برضو بيعتمد على كمية الأكل اللي جسمك محتاجها.
وده يوصلنا لنقطة مهمة جداً وأنت بتعمل نظام غذائي صحي، وهي Listen to your body، جسمك هو الـGPS أو الخريطة اللي بتوضحلك الطريق اللي محتاج تمشي عليه صح، فماتمشيش ورا أي كلام بيتقال.

ولو فيه أي أكلة عايز تتأكد من سعراتها الحرارية وتعرف بالكامل كل قيمتها الغذائية، هتلاقوا في أول كومنت لينك لويبسايت جميل جداً بتكبتوا في السيرش أسم الأكلة ويطلعلكم كل حاجة عنها

إنسى الخرافات اللي سمعتها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

زيت الزيتون!
أي حد هيبدأ يخس بيروح شاري كميات مهولة من زيت الزيتون وبيبقى شوية وهيزرع شجرة زيتون في البيت، وكإن ده رفيق الكفاح اللي هيساعده يخس في رحلة الدايت..
وبتبدأ تحطه في كل حاجة، مع الأكل، على السلطة، بنقلي فيه البيض، وخلاص قربنا نشربه، وبكده مبروك انت لبست في الحيط لأن زيت الزيتون مش هيخسسك.
هتيجي تقولي "إيه ده إزاي دي حاجة معروفة من زمان ومن مبادئ التخسيس؟!!"
خليني أقولك إن الكلام ده خرافة من خرافات كتير بنسمعها؛ لأن زيت الزيتون فيه calories أكتر من الزبدة، تخيل؟ الـ100 جم زبدة فيهم 750 سعرة حرارية إنما 100جم زيت زيتون فيهم 850 سعرة حرارية!!!
هو أينعم صحياً أكتر بس علشان هو مليان بالأوميجا والدهون الغير مشبعة اللي مفيدة لعضلة القلب، بس كونك إنك تحطه بكميات غير طبيعية، أو مثلاً تسخنه ده خطر تماماً على صحتك، يبقى ليه نلبس في الحيط؟
لو عايز تستفاد منه صح يبقى لازم تستخدمه raw وتحطه على السلطة أو الأكل بعد ما يستوي وبكميات محددة، وحطوا تحت محددة دي 100 خط.
وعلشان تعرفوا أكتر عن الكالوري اللي موجود في زيت الزيتون، هتلاقوا لينك في أول كومنت بيشرح ده بالتفصيل..
يلا أنسى الخرافات اللي كنت بتسمعها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

خرافة النهاردة بقى من العيار التقيل وهيكون بوست طويل جداً فهحتاج تستحملوا شوية ... موضوعنا النهاردة عن خرافات السناكس، ودي بقى فيها مصايب كتيرة، فخلونا نمسكهم موضوع موضوع سوا...

رقم 1: اللب السوري، وما أدراك ما هو اللب السوري، هتقولي ده لب صغير كده ومافيهوش مشكلة ومعروف إنه بيخسس، هقولك لأ اللب السوري ده مصيبة وفيه سعرات حرارية جامدة كمان، يعني الـ100 جم منه اللي بمقام كوباية الشاي وبتقعد تأزأزهم وتسلي نفسك بيهم خصوصاً في الأيام اللي إحنا فيها دي كده فيهم حوالي 700 سعر حراري، يعني الكيلو منه يزودك كيلو دهون!
فإحذر اللب السوري لا يخسس، اللب السوري به سم قاتل!!!!

رقم 2: الشيكولاتة الدارك، ودي بقى هيكون فيه معلومة مش هتصدقها، السعرات الحرارية في الشيكولاتة الدارك فيها نفس السعرات الحرارية اللي في الشيكولاتة العادية.. وتتقدر تتأكد من ده لو بصيت على نسبة السعرات ورا على كيسة الشيكولاتة، قارن وهتلاقي نفس الرقم تقريباً!
علشان كده لو ماشي على نظام غذائي ونفسك في شيكولاتة وبتحب الشيكولاتة العادية هقولك خد الشيكولاتة العادية؛ لأن فيهم نفس نسبة الـcalories وكمان طول ما انت حاسس إنك مش محروم منها وفي إيدك تاكل الحاجة اللي عاوزها مش هتحس إنك محروم منها ووبكده مش هتاكل منها كتير، فكل اللي بتحبه بكميات صغيرة.

رقم 3: بسكوت الشوفان، البسكوت ده مش بيخسس نهااااائي ، ده بسكوت زي أي بسكوت، آه فيه شوفان بس فيه معاه زبدة وسكر، فالبسكوتة الواحد منه اللي بناكلها عادي دي فيها 75 كالوري فلما تاخد أكتر من واحد فأنت كده بتاخدها على أساس إنك بتضحي وحارم نفسك، وهي في الحقيقة سعراتها عالية.
وعلشان تعرفوا أكتر عن السعرات الحرارية لبسكوت الشوفان هتلاقوا في أول كومنت لينك فيه كل المعلومات.

رقم 4: الزبادي بالليمون، ناس كتير بتاخد الزبادي بالليمون على أساس إنه بيزود الحرق، ودي بقى الخرافة الأزلية اللي بيمشي عليها 90% من اللي بيعملوا دايت ونفسي ألغيها.. يا جماعة الزبادي بالليمون مالهاش علاقة بتسريع الحرق من قريب أو من بعيد، فإحذروا هذه الخرافة.

إنسى الخرافات اللي كنت بتسمعها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

أزيكم، النهاردة عايزة أحكيلكم حدوتة صغيرة كده حصلت معايا... كنت قاعد في مرة مع حد في جلسة المتابعة ولقيته بيقولي: "يا دكتور أنا إكتشفت جاتلي فكرة كويسة أوي " فقولتله خير إيه هي
قالي "بدل ما أفضل أكل في فاكهة وأدبس في السعرات الحرارية اللي فيهم، ممكن أشربهم عصير ومن غير سكر، مش ده هيبقى أحسن؟"
وأكتشفت بعدها إن فيه ناس كتير عندهم نفس الفكرة دي، من غير ما يعرفوا إنهم زرعوا فكرة شريرة جداً جوا مخهم..
قولنا مليون مرة الدايت مش حرمان، لو في إيدك تاكل بكميات معقولة حاجة مفيدة وبتحبها وتستمتع بيها، ليه تحرم نفسك منها؟
لما تيجي تاكل مثلاً 4 برتقانات، هتقرشهم وتفصصهم وتاكلهم وتمضعهم، على عكس لما تيجي تشرب كوباية العصير، هو برتقان اتعصر وهوب أتشرب مرة واحدة
يعني انت استهلت طاقة في أكل البرتقان ده، والسكر اللي طلع منه ماطلعش مرة واحدة، والألياف اللي فيهم كمان شبعتك...
على عكس لو شربتها عصير، ده عبارة عن عصير سكر؛ لأن السكر اللي فيه طلع مرة واحدة وهيعلي لك الأنسولين مرة واحدة وهيتخنك حتى لو مش حاطط فيها فتفوتة سكر.
ولو عاوزين تقارنوا بين السعرات الحرارية لفاكهة البرتقال وعصير البرتقال، هتلاقوا في أول كومنت لينك لكل واحد فيهم بيوضح الكالوري بتاعهم قد إيه..
وعلى فكرة فيه برضو معلومة خاطئة تانية بسمعها إن "ماتاخدش فاكهة بعد الأكل على طول علشان ده هيأثر على الحرق"
بالعكس الفاكهة دي حاجة مفيدة خصوصاً للناس اللي بتحب تحلي بعد الأكل، وتقدر تاكلها قبل أو بعد أو حتى وسط الأكل، مش هتأثر عليك نهائي طول ماهي بكميات معقولة.
إنسى الخرافات اللي كنت بتسمعها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

عايز تلعب رياضة علشان تخس؟ طب على فكرة الرياضة مش وسيلة للتخسيس!
ودلوقتي طبعاً أول حاجة جت في دماغك إن الكلام ده جنان ومستحيل يتصدق، ده هذا ما وجدنا عليه أباءنا وأجدادنا، هنصنع قواعد مخالفة للطبيعة؟
خلونا الأول نتفق إن الرياضة مهمة جداً جداً جداً، وبتحافظ على الكتلة العضلية بتاعتي وعلى معدل الحرق وأنا بعمل دايت، وبتحسن الحالة المزاجية وبتخلي الجسم شكله حلو ومتناسق.
بس برضو مش وسيلة تخليني أخس، وأقولك حاجة كمان؟ لو بطلتها مش هتتخن!
"طب إزاااي"
أنا لو بلعب رياضة حتى لو رياضة عنيفة بيكون معدل السعرات الحرارية اللي بحرقها من 400 لـ 500 كالوري، مع العلم إن كيلو الـfat حوالي 7000 كالوري فبرضو الرياضة لوحدها مش هتخسسني، ولو جيت في يوم بطلت رياضة وطريقة أكلي والـlifestyle بتاعي زي ماهو جسمي مش هيتأثر، ممكن يتأثر بس في حالة لو أنا professional athletic.
هتيجي تقولي "يعني كل اللي كنت بعمله وإشتراك الجيم ده راح على الفاضي؟"
لأ خالص أنا مابقولكش الكلام ده علشان أحبطك إنما علشان أحط على التراك الصحيح اللي يساعدك تخس صح.
مفتاح الحدوتة دي كلها في الأكل، الرياضة والأكل بيكملوا بعض، فلو أنت بطلت رياضة وأكلك صحي زي ما هو مش هتتخن، بس لو بطلت رياضة وفضلت تعك وتلخبط أكتر من الأول يبقى أكيد هتتخن لأن الـlifestyle بتاعك إتغير مش علشان وقفت رياضة.
ونفس الكلام برضو وأنت بتخس، لو بتلعب رياضة من غير ما يكون فيه نظام غذائي صحي مصاحب للرياضة وعايش بنفس الـlifestyle بتاعك، يبقى طبيعي مش هتلاقي نتيجة، بس لو فيه نظام غذائي صحي أكيد هتلاقي نتيجة.
إنسى الخرافات اللي كنت بتسمعها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

حلم حياتها إنها تتخن، تاكل مهما تاكل وبرضو مش بتتخن، تعمل 500 وصفة وبرضو لا حياة لمن تنادي!
لحد ما في يوم سمعت من صاحبتها إنها أخدت فيتامين وتخنها، وتروح الفكرة تلعب في دماغها، أصل ده فيتامين ومضمون مش هيعملي حاجة! وهووووب تروح تجري على أقرب صيدلية وتشتري فيتامين ... وتفضل تاخد يوم ورا التاني ورا العاشر لحد ما تدخل في شهر...
عايزين تعرفوا النتيجة كانت إيه؟
برضو محصلش حاجة!
الفيتامين لا بيفتح النفس ولا بيتخن، الكلام ده أكذوبة وخرافة من الخرافات اللي بنسمعها وللأسف كمان الإفراط في استخدام الفيتامينات بالذات D E K A ممكن يأثر على الجسم بالسلب و يسبب تسمم لإن الجسم مش بيتخلص منه بسهولة.
فيه ناس مثلاً تقول "خد فيتامين ب علشان بيفتح النفس"، برضو الكلام ده مالهوش أي أساس من الصحة.
علاقة الفيتامين بجسمنا، إن الجسم بياخد من الفيتامين اللي هو عاوزه والباقي بيروح لما بتدخل الحمام، يعني بعيد كل البعد عن التخن أو فتح الشهية.
إنسى الخرافات اللي كنت بتسمعها زمان وإمسحها بأستيكة، وأكتب من أول وجديد بدالها عادات صحيحة وصحية تكون بجد خير رفيق ليك في رحلتك للـHealthy Life.

"مكرونة إيه دي اللي عايز تاكلها مع الدايت! المكرونة دي مُحرمة عليك خلاص"
الناس بتتعامل مع المكرونة في الدايت إنها حرام ولو حد بيعمل دايت وشاف طبق مكرونة قدامه بيتعامل معاه معاملة القنبلة الموقوتة، اللي هو هيسيبها ويطلع يجري... وكتير في الكومنتات بيستغربوا إن فيه وصفات بنزلها فيه مكرونة أو إننا بنقول كل كشري بكميات معقولة عادي وكإنه ده جنان!!
بس تعالوا كده مع بعض واحدة واحدة، هو مش مسموحلك في الدايت تاكل بروتينات زي الفراخ واللحمة المشوية والسلطة وبس؟ طب تعرف إن جرام البروتين في 4 كالوريز وجرام الكاربوهيدرات فيه 4 كالوريز برضو؟ يعني هي هي
بس النقطة اللي بتفرق في كــــل الكلام ده حاجة إسمها Satiety Index.
"طب ودي تطلع إيه يا دكتور؟"
ده بقى المؤشر بتاعك اللي بيقولنا أنت بتشبع بعد كمية قد إيه من الأكل وبتجوع بعدها بـ قد إيه، يعني يعنى لو بتشبع بكمية قليلة من الأكل ده و وبتجوع بعدها بفترة طويلة ده معناه إن الـ Satiety Index بتاعتك عالية و وهتاخد كمية من الأكل أقل، وهو ده الفرق إن الـ Satiety Index بتاعت البروتين أقل من الكربوهيدرات.
ومن الحاجات اللي خلت المكرونة (أكلة سيئة السمعة في الدايت) هو طريقة طبخها! بسبب إنها بتبقى مغرية أكتر وهي غرقانة في البشاميل أو الجبنة، وده طبعاً غلط في الدايت، لكن فيه طرق تانية مفيدة وصحية ولذيذة جداً كمان ممكن تعملوا بيها المكرونة، ولو عايزين تعرفوا الوصفات دي هتلاقوا لينك لكتاب الطبخ موجود في أخر البوست.
وفي النهاية أحب أقول إن وجبة مغذية في الدنيا لازم يكون فيها عناصر غذائية مكتملة حتى لو نشويات لأن ماينفعش البني آدم يقعد ماياكلش لا رز ولا مكرونة ولا عيش طول حياته، دي حتى تبقى حياة مملة خالص والله
وبعدين لما تمنع النشويات دي عنك وخلاص بقيت تنزل في الميزان (والله أعلم بقى بتنزل مياة ولا دهون ولا عضلات) وتيجي بعد ما تخلص الدايت ترجع تاكل نشويات فجأة زي زمان يبقى طبيعي هتلاقي نفسك بتزيد وإن مكانش أكتر من الأول، يبقى ليه كل ده؟ خلينا نمشي صح وبالمظبوط وبالمنطق علشان ننزل في الوزن من غير ما نخسر صحتنا أو المجهود اللي أشتغلنا بيه.

عيش السن أو الشعير زيهم زي العيش العادي، ومش نازلين برخصة بتقول (كل براحتك أي كمية منهم لأن دول بتوع دايت ومش بيتخنوا)
وبعدين عيش سن ورز بني ومكرونة بني، كفاااااااية خليت حياتك بني × بني!! مجالكش اكتئاب؟؟ خليك كده في العيش البلدي بتاعنا حتى طعمه أحلى وأسمه بلدي.
هو العيش السن آه صحي عن العيش الأبيض؛ لأنه بيرفع الأنسولين والسكر في الدم بدرجة أقل علشان المؤشر الجليسمي (GI index) بتاعه أقل من الدقيق الأبيض.
لكن كتر أكل عيش السن بيقلل إمتصاص الحديد والكالسيوم في الجسم، وكمان 90% من العيش السن اللي موجود في السوبر ماركت بيبقى فيه عسل أسود وسكر يعني ميزته اللي كنت بتستخدمها للدايت دي بتروح، وتانى حاجة إنه بيقعد فترة أطول في البطن فبدل ما يقلل إحساسك بالجوع بيعمل العكس علشان فيه عسل أسود وزي ما إحنا عارفين العسل بيزود إحساس الجوع، فلو ناوي تشتري عيش سن لازم تتأكد إن مافيهوش عسل أسود.
نفس الكلام بيمشي برضو على الرز والمكرونة البني دول، هما صحياً أفضل علشان الألياف الموجودة فيهم أعلى و المؤشر الجليسمي (GI index) فيهم قليل زي عيش السن، بس تقريباً فيهم نفس نسبة الكالوريز الموجود في الرز والمكرونة العاديين، فماتمشيش ورا أي خرافات وخد بالك.

عزيزي الدايتاوي... أولاً مساء الخير، وثانياً شيل إيدك من على علبة السكر البني والعسل الأبيض اللي عمال تحطهم عمال على بطال في أي حاجة دول
هل تعلم إن السكر البني اللي فاكره حلو ومفيد للدايت ده ما هو إلا سكر التموين بتاع زمان؟ آه والله زي مابقولك كده..
السكر ده بيكون غير مكرر وكمان مضاف له لون، يعنى لو دوبته كده في كوباية مياة هتلاقي لون المياة بيتغير، وكمان فرق الكالوريز بينه وبين السكر الأبيض بسيط، لأن المعلقة من السكر البني فيها 43 كالوريز أما الأبيض فيه 49 كالوريز، وبرضو الفرق بينهم وبين معلقة العسل الأبيض الصافي مش كبير؛ لأن العسل ده فيه 40 كالوريز وبيرفع نسبة السكر في الدم زيه زي السكر بالظبط.
السكر بيتكون من جلوكوز وفركتوز، يعني حتى سكر الفاكهة جزء عادي من السكر العادي، وحتى لو أستخدمنا السكر الفركتوز كمحلي برضو هنلاقيه بيرفع السكر في دم ويسبب سمنة!
ده غير إن مادة الفركتوز دي بتعدي الأول على الكبد قبل ما توصل للدم وده ممكن يسبب دهون على الكبد.
علشان كده عايزك تهرب من السكر البني والعسل والعسل والفركتوز وتتعامل معاهم كإنهم زي السكر الأبيض بالظبط.

إمسح المفاهيم دي من عندك، وسيبنا نصطاد الخرافات دي من مخك
من النهاردة إحنا هنصطاد الخرافات ❌ وانت عليك تصحح العادات ✅
يلا بينا نبدأ من أول وجديد.

Myths Buster - Dr. Ahmed Noweir (Healthy Life Clinics)

Published: July 5th 2020

Follow All Following All Unfollow All

Myths Buster - Dr. Ahmed Noweir (Healthy Life Clinics)

Owners

Credits

Project Made For

Myths Buster - Dr. Ahmed Noweir (Healthy Life Clinics)

Campaign about diet myths and how to debunk them

Creative Fields