تحط صورة في الـ C.V  بتاعك ولا لأ؟

ناس كتير بتحتار وهي بتعمل السي في بتاعها خصوصا ان دلوقتي في تغيير كبير في شكل السي في التقليدي وبيسألوا نفسهم..ياترى أحط صورة شخصية في السي في بتاعي ولا مااحطش؟

الإجابة ببساطة أن الموضوع ملهوش قاعدة محددة، لأن الموضوع بيتوقف على طبيعة الشغلانة نفسها، زي وظيفة مضيفي الطيران كدا، مظهرهم بيحدد إذا كانوا هيتقبلوا ولا لأ، علشان كدا بيشترطوا عليهم أنهم يحطوا صورة ليهم، دا غير أن في وظائف تانية وشركات بتشترط دا، في الحالة دي هيبلغوك ويقولولك أن الـC.V بتاعك لازم يكون فيه صورة شخصية لك عشان يتقبل، بس دا ميمنعش أنك تقدر تحط صورة لك عادي من غير ما حد يطلب منك، وبردو الـ C.V بتاعك هيبقى شكله احترافي.

بس استنى ماتستعجلش وتروح تفتح جاليري الموبايل وتختار صورة شبه الصور اللي بتنزها على الفيس.

الصورة لازم تبقى بروفشنال، يعني شبه الصور اللي بنحطها على الشهادة الجامعية كدا، لو معندكش يبقى بلاش منها خالص، واستنى لما هما يقولولك.